من نحن؟

بوابة الميدان بوابة الكترونية تم تصميمها عشان تكون مساحة نتعرف فيها على بعض وعلى المبادرات والمشروعات والأنشطة اللي بنشتغل عليها ونقدر ننسق مع بعض وندعم بعض من خلالها ... مش بس كده ... بوابة الميدان كمان حتكون مساحتنا المشتركة اللي حنحاول من خلالها نعيش و نتبنى قيم افتقدناها كتير ...

عشان ببساطة المساحة دي تكون آمنة ومختلفة .. لازم نضمن احترام للاختلاف سواء كان في الفكر, في الدين, في الجنس, في العمر, وفي المستوى الاجتماعي ... ولازم كمان نقرر إزاي حنتعامل مع الاختلاف ده. ده خلانا لازم نجاوب على عدد من الأسئلة وأهمها سؤال "حنظهر ولا نخفي؟" بمعنى حنظهر الاختلاف ده أصلا ولا حنخفيه .. وإجابتنا في الميدان كانت اننا مش بس حنظهر الاختلاف ده ... لا احنا حنحتفل بيه كمان لأنه واقع لازم نتعلم إزاي نتعامل معاه بدلا من إخفاؤه والهروب منه ومحاولة طمسه!

عشان كده حنطلب من كل واحد يقول لنا هو اتولد امتى عشان نعرف الجيل اللي بينتمي ليه ... ذكر ولا أنثى ... مسلم ولا مسيحي ولا غير مؤمن ... منتمي لأي فكر سياسي ... وممكن نبقى نطلب بعدين من كل واحد يقولنا مستواه الاجتماعي كمان.

طبعا كل واحد حر يقول ويظهر اللي هو مستريح له ... لكننا بنشجعكوا انكوا تعلنوا للجميع انتماءاتكوا ونحتفل كلنا باختلافنا ونحاول نتواصل سوا ونبني جسور ثقة ما بيننا .. لأننا دايما وبغض النظر عن انتماءاتنا بتجمعنا قيمة قبول واحترام الآخر ...

هل من الممكن ان تكون بوابة الميدان مساحة نتأكد من خلالها أن اختلافنا ثراء ... وأن أي نزاع ممكن يحصل هو فرصة حقيقية لينا اننا ننمو ونسمو ونتوافق سويا ونخلق حلولا إبداعية من وحي خبراتنا ومن وحي اختلافنا؟ حنشوف